逐漸進入北極圈 Day 12

Travelling Date: 31 July 2015 (Fri)

這天是超級移動日，大部分時間都是在交通工具上。
簡單講一講:
1.  Geiranger 坐巴士去Andalsnes
2.  Andalsnes 坐火車去Dombas
3.  Dombas 坐火車去 Trondheim
4. Trondheim 坐夜火車去Bodo

嘆左個早餐，再到屋前的峽灣作最後一望。然後，我們要打掃好間屋，把屋企還完原貌，因為我們沒有付清潔費(100NOK per day)。

我們慢慢拖著行李行去市中心的車站，聽講巴士會途經我們住的地方，但是我們都不敢搏，因為上唔到車就好麻煩。

12時左右，巴士準時到達。這程巴士是由Geiranger 去 Andalsnes，即是老鷹之路和精靈之路，車程3.5小時，車費260NOK。

巴士沿著老鷹之路一直向高山前行，到了一個觀景台，讓我們落車影相。

我覺得這程是觀光巴士，因為原本以為是中途站讓乘客去洗手間休息，原來是有美景欣賞啊! 當時又落雨又凍，我們快快跟好多人行，一路行都唔知去邊，其中兩位朋友行行下都打退堂鼓。我就把心一橫，一直向前走，終於見到個影相位，同時又見到彩虹呀! 真是好開心。 

最後一位朋友仔見下雨，時間又不多，連佢都不再去第二個景點。我就一個人跑跑跑去，因為時間好趕，第一站花了太多時間。原來這裡就是可以影到整條精靈之路。當時真係哇左一聲!!! 好震撼呀! 

影完相，以極速跑回停車場，跑到上氣唔接下氣。眾多旅遊巴中難以辨認，幸好朋友仔站在車前，好快就找到了。

落山這條路就真係考考司機的技術了。

慢慢行，安全至上，終於平安落到山谷了。

下午兩時半到達Andalsnes，我們就搵下四周圍行下，搵下有咩嘢食。

下午5時，坐火車去Dombas，車程約1.5小時。
沿途風光優美，又快又舒服就到達Dombas。

Dombas 是一個小小的火車站，附近沒有什麼好看，大家都坐在候車室等，幸好候車室有插蘇位可以义電，不過沒有wifi不能上網。
無無聊聊，唯有在外面行行企企，影下相。

這時已經是晚上7點幾，好似下午一樣。
終於等到火車來了，晚上8時上車，10:40pm到達Trondheim。

到了Trondheim，等一個小時(其實不用等太久，因為火車一早已經準備好，可以提前半小時就可以上車)，23:40再登上夜火車，瞓一晚，明09:15到達Bodo。

這程夜火車是兩人一間房，我覺得自己去左first class，因為車廂房間的設施實在太好了。

每間房拍卡開門，走廊乾淨，雙人坐位。

房間內，每張床都放了朱古力，很窩心。有床頭燈，有义電位，最勁係有個手機插，唔怕瞓瞓下，手機會碌走左。

瞓上格床都唔洗怕，有條梯幫你爬上去。我最記得坐西伯利亞火車，一定要用手撐上去。

有兩個掛衣位，非常體貼。

最最最緊要係有洗手盤，有兩枝免費水，水杯，竟然有耳塞。哇! 我真係覺得一級享受，而且我從未試過瞓夜車，可以一覺瞓天光，中間沒有醒過，感覺好安全，火車好平穩，沒有大搖晃。

由Andalsnes一直坐火車去到Bodo，一共3程火車，其中1程是夜火車(2人一房)，車費只是HK829，超值。